تفریح اور جسم و روح کی تازگی کے لیے کیے جانے والے سفر کو سیاحت کہا جاتا ہے۔ فطری طور پر سیاحت کا شوق ہر انسانی دل میں کسی نہ کسی صورت موجود ہوتا ہے جسے ہر انسان اپنی استطاعت اور حالات کے مطابق پورا کرنے کی کوشش کرتا ہے۔ اب یہ اس کے ذوق اور وسائل پر منحصر ہے کہ وہ اپنا یہ شوق کسی مذہبی مقام، پُرفضا مقام، قدرتی مناظر سے مزین مقام، پہاڑوں، دریاؤں، صحراؤں، سمندر یا دورِ حاضر کی جدید ٹیکنالوجی سے لیس پُرہنگم مقام کی طرف سفر کرکے پورا کرتا ہے۔

سیاحت نہ صرف سیروتفریح اور صحت افزائی کے لیے مفید ہے بلکہ سیاحت سے مقامی آبادی اور اس ملک کی معیشت کو بھی تقویت ملتی ہے۔ لوگوں کو کام کے مواقع فراہم ہوتے ہیں۔ سیاحت سے مختلف ثقافتوں اور خطوں سے تعلق رکھنے والے لوگوں کو ایک دوسرے کو سمجھنے کا موقع ملتا ہے اور مختلف اچھی چیزیں ایک معاشرے سے دوسرے میں رائج ہوجاتی ہیں۔ گویا کہ فی زمانہ سیاحت ایک انڈسٹری کی حیثیت رکھتی ہے۔